काठमाडौं – ‘रूपान्तरणका लागि व्यवहारिक पहल, पाठ्यक्रममा कृषक व्यवसाय पाठशालाको समायोजना, अभ्यास, अवलम्बन र अबको बाटो’ विषयक दुई दिने राष्ट्रिय कार्यशालामा सहभागी अध्यापक, सरकारी पदाधिकारी, जनप्रतिनिधि, किसान तथा दातृ निकायका विज्ञहरूले कृषि शिक्षालाई व्यवहारिक रूपमा पाठ्यक्रममै समावेश गर्नुपर्नेमा जोड दिएका छन् ।
उनीहरूले पाठ्यक्रममा कृषक व्यवसाय सम्बन्धी अध्ययन र अभ्यास समावेश गरिएमा कृषि पेसा केवल जीविकोपार्जनमा सीमित नरही व्यवसायिक रूपमा विकसित हुन सक्ने धारणा राखेका छन् ।
उक्त कार्यशालाको उद्घाटन माननीय कृषि तथा पशुपन्छी विकास मन्त्री डा. मदन प्रसाद परियारले गर्नु भएको थियो । कार्यक्रममा नेपालका विभिन्न विश्वविद्यालयका कृषि संकायका प्रमुख तथा प्रतिनिधि, तहगत सरकारका प्रतिनिधि, किसान, संघ–संस्था र सञ्चारकर्मीहरूको उल्लेखनीय सहभागिता रहेको थियो ।
यो कार्यशाला राष्ट्रिय कृषक समूह महासंघ, नेपाल र कृषि तथा वन विश्वविद्यालयको संयुक्त आयोजनामा तथा CARE Nepalको सहकार्यमा सम्पन्न भएको हो ।
